Bugal sang Capiz, nga nangin kabahin sa Top 11 Finalist sa Universitas Semarang International Students’ Speech Competition kag ginpasidunggan bilang Best Speech Technique Award nga ginhiwat sa pungsod Indonesia ang tumandok sang Poblacion Norte, Ivisan Capiz.
Sa interview sang Bombo Radyo kay Ms. Lenice Joy Orocio B.A Political Science student sang Filamer Christian University, ginpakigbahin sini nga ang makipagkompetensya sa iban nga mga estudyante nga nagikan sa nagkalain-lain nga pungsod indi madali kag mahupos.
Mahibaluan nga isa lamang si Orocio sa 4 ka mga estudyante ang representar sang Pilipinas pinaagi sa isa ka short term exchange student program sang isa ka asosasyon.
Ang nasambit nga kompetisyon ang ginpakigbahinan sang 120 nga mga partisipante nga nagikan sa nagkalain-lain nga pungsod Asya nga ginpatigayon sadtong Pebrero 18 tubtob 29, subong nga tuig.
Suno kay Orocio, isa ini ka dako nga dungog para sa iya nga nahatagan sang opurtunidad kag prebilihiyo ng mapabati kag mapakigbahin sa luwas sang pungsod ang iya tinutuyo kag adbokasiya bilang isa ka estudyante kag lider.
Ginpabugal man sini nga indi lamang bilang isa ka Capizena kundi bilang isa ka Filipino nga sarang makigbato kag malapawan ang mga kasubong sini nga kompetisyon.
Bangud ini ang una nga kahigayunan nga makigbahin international, indi madula ang kakulba apang tuman ang kasadya bangud napabati kag napakigbahin ang iya sentimento angut sa topiko nga quality education.
Mensahe sini sa mga kaangay estudyante nga may huyog magpartisipar sa luwas sang pungsod ukon sa bilog nga kalibutan, indi lamang madulaan sang paglaum nga maabot ang handum sa kabuhi apisar nga mabudlay lab-uton bangud kabahin ini sang kabuhi sang isa ka indibiwal.
