Nagapabilin nga stable ang presyo sang bugas sa Roxas City, partikular sa Teodoro Arcenas Trade Center, bisan pa nga natapos na ang pagpatuman sang P50 nga price cap sa bugas.
Sa interview sang Bombo Radyo kay Edilberto Cambe, presidente sang Roxas City Rice Retailers Association, iya ginpahayag nga wala sang may nabatyagang paghulag sa presyo sang bugas sa merkado.
Suno sa iya, sa pagsulod sang tig-ululan, mahatagan naman sang kahigayunan ang mga mangunguma nga makatanom liwat, nga nagalauman nga magadugang sa suplay sang bugas sa masunod nga mga bulan kag magabulig sa pagpadayon sang stable nga presyo.
Pahayag pa niya, padayon siya nga nagapakig-angot sa mga miyembro sang asosasyon agud mabatian kag mahibaluan ang ila mga sentimyento kag kahimtangan sa negosyo.
Nagpasalig man ang natungdan nga padayon nila nga bantayan ang kalidad sang bugas nga ginabaligya sa merkado agud masiguro nga makabaton ang mga konsumidor sang maayo kag de-kalidad nga produkto.
