Natukiban ang pagtipon sang mga warships kag mga fighter jet sang Amerika malapit sa pungsod Iran.
Ini sa tunga sang pagpang-ipit sang US sa Islamic country bangud sang ila programa militar kag ang makamamatay nga pag-crackdown sang mga nagaprotesta sang damlag lang.
Lakip sa mga nakit-an malapit sa Iran amo ang US aircraft carrier nga USS Abraham Lincoln, nga nagapanguna sa isa ka strike group nga may tatlo ka guided missile destroyers kag 90 ka mga eroplano lakip ang mga fighter jet, nga ginreport nga gin-deploy sa Gulf region sang ulihi nga bahin sang Enero apang wala pa makit-an sa satellite imagery tubtob subong.
Apisar nga natukiban na ang lokasyon sini sa Gulf of Oman, ginabulubanta nga 700 kilometros ang kalayuon sini sa Iran.
Ginreport man sang US nga ginpadala sini sa Middle East ang USS Gerald R. Ford, ang pinakadaku nga warship sa kalibutan, sa diin ginalauman nga magaabot ini sa rehiyon sa masunod nga tatlo ka semana.
Nahibaluan nga natalana nga magkit-anay ang mga opisyal sang Amerika kag Iran sa Switzerland para sa ikaduha nga hugna sang paghinun-anon nga nagatuyo sa pagpahagan-hagan sang tensyon sa tunga sang duha ka pungsod.
Suno sa Iran, ang sentro sang pagsinapol amo ang ila nuclear program kag ang posible nga pagdula sang mga economic sanctions nga ginpatuman sang US.
