Ginakabig nga isa ka himala ang pag-drive sang isa ka bulag nga lalaki nga yara sa impluwensya sang makahulubog nga ilimnon, ilabi na nga wala sang may nasamaran sa insidente.
Suno sa report, nanotisyaran sang mga otoridad ang isa ka salakyan nga nagabaylo-baylo sang linya samtang nagalabay sa M6 motorway malapit sa Carlisle, United Kingdom.
Nagapati ang mga patrol officers nga isa lamang ini ka kaso sang hubog nga nagamaneho, apang daku ang ila pagkibot sang ila gin-check ang driver sang salakyan.
Natukiban nga ang driver nga ginkilala nga si Anthony Hall wala sang lisensya kag insurance, kag halos bulag na ukon “legally blind” sa sulod sang duha ka tuig.
Dugang pa, yara sa impluwensya sang makahulubog nga ilimnon si Hall sang tion nga nadakpan siya, apang wala sang may nasamaran ukon naapektuhan sa nasambit nga insidente.
