Ginhinalaan sang Capiz Provincial Government ang paghatag sang bulig para sa mga mangunguma kag mamumugon sang tubo nga apektado sang Red-striped Soft Scale Insect ukon RSSI infestation.
Ini nga tikang ginahimo sa idalum sang liderato ni Governor Fredenil H. Castro, bilang suporta sa mga mangunguma kag mamumugon nga nagaatubang sang mabudlay nga kahimtangan bangud sa paglapta sang peste sa mga tanuman sang tubo.
Sang Setyembre 4, 2026, nagpakig-angut ang talatapan sang Gobernador kay Acting Provincial Agriculturist Rufino Ashbel Gad Dunton, OPA Consultant Sylvia dela Cruz kag PSWDO Head Joerine Tan para sa pagplano kag koordinasyon sang ginatinguhaan nga programa sang bulig para sa mga apektado.
Suno sa Gobyerno Probinsyal, tuyo sang sini nga bulig nga mabuligan ang mga apektado samtang nagabawi sila kag nagapadayon sa ila pang-adlaw-adlaw nga pangabuhi.
Kabahin man ini sang mga tikang sang Probinsya sa pagpauntat ukon pagpugong sang paglapta sang RSSI. Lakip diri ang RSSI Mitigation Activities, pareho sang drone-assisted Biological Control Agent ukon BCA spraying demonstration nga ginapatigayon sa mga apektado nga kabanwahanan.
Ginapahayag sang Provincial Government nga ang pag-atubang sa sini nga krisis indi dapat pas-anon sang isa lamang ka grupo. Padayon ang pagbuligay kag koordinasyon agud mabuligan ang mga mangunguma kag mamumugon sang tubo nga naapektuhan sang RSSI infestation.
Sa tunga sang mabudlay nga kahimtangan, ginapasiguro sang Provincial Government nga ang mga Capiznon indi magaisahanon kag may ara sila sang gobyerno nga handa mag-upod, maggiya kag magsuporta sa ila.
