Ginpasalig sang Department of Trade and Industry (DTI) ang bulig sa mga Filipino exporters nga apektado sang mas mataas nga taripa sang US sa pagpangita sang bag-o nga mga merkado.
Suno kay Trade Secretary Cristina Roque, padayon nila nga palaparon ang network sang negosyo agud makahatag sang dugang nga mga oportunidad sa negosyo kag mas maayo nga pag-access sa merkado para sa mga exporter.
Ini nga panindugan nagluntad kasunod sang pagpatuman ni US President Donald Trump sang mas mataas nga taripa sa mas madamo nga pungsod lakip na nag Pilipinas. Apang gin-atrasar ang implementasyon sang pito ka adlaw halin sa deadline sang Agosto 1.
Kasunod sang pag-istoryahanay sang nagligad nga bulan, ginpahayag ni Trump nga magapatuman siya sang 19-percent duty sa Philippine exports sang US, manubo sa 20 porsyento nga una nga gin-anunsyo sang Hulyo apang mas mataas sang sa 17 porsyento nga gin-anunsyo sang Abril.
Ang mga detalye sang kasugtanan, nga nagalakip sang zero tariffs sa pila ka mga eksport sang US, gina-negosyar kag gina-finalize pa.
Ang mga opisyales sang DTI nagsiling nga samtang luyag sang Pilipinas nga mapauswag ang negosyo sa US, nagatrabaho man sila sa mga kasugtanan upod sa iban nga mga merkado pareho sang European Union, Chile, kag United Arab Emirates.
Suno kay Roque, mahimo magpangayo sang bulig sa DTI ang mga exporters nga luyag mangita sang iban nga merkado, dugang pa niya nga “mahapos para sa ila ang mag-organisar sang nagkalain-lain nga pagsinapol sa luwas sang pungsod ukon sa bug-os nga kalibutan gamit ang DTI offices kag trade missions.”
