ROXAS CITY – May pauna nga bulig nga ginhatag ang pamunuan sang Carles, Iloilo sa apektado nga mga residente sang apat ka barangay sa Gigantes Island matapos ginpaidalum sa state of calamity bangud sa resensiya sang red tide toxin.
Nahatagan na sang mga food packs kag relief goods ang mga apektado nga pamilya bilang inisyal nga bulig nga ginhatag sang gobyerno sang Carles, Iloilo. May dugang pa nga bulig nga ihatag sa mga residente kasubong sang cash ukon food for work program para may magamit sa kinahanglanon sang ila pamilya.
Samtang sa exclusive interview sang Bombo Radyo Roxas kay Mayor Sigfred Betita sang Carles, Iloilo, ginpahayag sini nga ginpanugyanan sini ang nagabisita nga mga turista nga likawan ang pagkaon sang mga pakinhason bangud sa presensiya sang red tide toxin sa kadagatan sang Gigantes Island.
Kalakip sa apat nga mga barangay nga apektado sang red tide amo ang Granada, Asluman, Gabi kag Lantangan.
