Naglupok ang Hayli Gubbi volcano sa northeastern portion sang Ethiopia kun sa diin amo ang una nga paglupok sini matapos ang halos 12,000 ka-tuig. Naglab-ot sa 14 kilometro ang kadakmulon sang aso nga nagsaka sa kahawaan kag naglab-ot tubtob sa Yemen kag Oman.
Suno sa lokal nga opisyal nga si Mohammed Seid, wala sang may nareport nga napatay, apang nagakabalaka siya sa posible nga epekto sini sa pangabuy-anan sang mga pastor sa lugar bangud natabunan sang madakmol nga abo ang madamo nga mga banwa, rason nga madulaan sang makaon ang ila nga hinuptanan nga kasapatan.
Makit-an ang bulkan sa Afar region, isa ka bahin sang Rift Valley nga kilala sa tuman nga geological activity. Nakabati naman sang makusog nga pagsigabong ang isa ka residente nga si Ahmed Abdela, kun sa diin ginsaysay sini ang tunog nga kaangay may hinali nga naglupok nga bomba kadungan sang pagbuga sang aso kag abo.
Padayon nga ginabantayan sang mga awtoridad ang sitwasyon kag pagpalapta sang ash cloud nga naglab-ot pa sa India kag Pakistan.
