Bundibugyo virus disease, padayon nga nagalapta sa DR Congo; Death toll naglab-ot na sa masobra 1,500

Padayon nga nagalala ang nagalapta sang Bundibugyo virus disease (BVD), isa ka sahi sang Ebola virus disease, sa Democratic Republic of the Congo (DR Congo), matapos nga naglapta ini sa lima ka mga probinsya kag 49 ka mga health zones.

Base sa pinakaulihi nga data, naglab-ot na sa 3,605 ang kumpirmado nga kaso samtang 1,587 naman ang narekord nga napatay bangud sa nasambit nga balatian.

Suno sa mga otoridad, mabudlay ang pagsabat sa outbreak bangud sang kinagamo, pag-evacuate sang mga pumuluyo, kag paghulag sang mga tawo sa tabok sang border.

Padayon naman nga nagapakig-angot ang gobyerno sang DR Congo sa World Health Organization (WHO) agud makontrol ang paglapta sang virus kag malikawan ang dugang nga kaso.