Preparado na ang Bureau of Fire Protection (BFP) sa Capiz para sa pagpatuman sang Oplan Kaluluwa 2026 agud masiguro ang seguridad kag kaluwasan sang publiko sa tion sang pagdumdom sa mga minatay sa masunod nga selebrasyon sang Undas.
Padayon man ang pagpalapnag sang impormasyon sa publiko kag ang koordinasyon sang ahensya sa nagkalain-lain nga ahensya sang gobyerno agud masiguro ang hapsay nga pagpatuman sang mga tikang para sa kaluwasan sang publiko.
Sa interview sang Bombo Radyo kay Fire Chief Inspector Arden G. Bedoña, Roxas City Fire Marshal, iya ginpahayag nga nagapatigayon na ang BFP Roxas City sang fire safety inspection sa mga terminal kag pantalan bilang kabahin sang ila pagpanghanda sa pagdugok sang mga pasahero sa tion sang tigkalalag.
Samtang, suno kay Senior Fire Officer 2 Sussie May Magan, Chief sang Community Relations Unit sang Roxas City Fire Station, magapaidalom sa Red Alert status ang mga katapo sang BFP sugod sa masunod nga mga adlaw agud masiguro ang kahandaan kag madasig nga pagresponde sa mga emerhensya.
Paagi sa amo nga tikang, ginapaabot nga mas mapadasig ang pagresponde sang mga bombero sa mga insidente sang sunog kag iban pa nga emerhensya, ilabi na sa mga lugar nga ginapaabot nga madamo sang tawo sa tion sang Undas.
Nagpanawagan man ang natungdan sa publiko nga maghalong, sundon ang mga fire safety precaution kag magbuligay sa pagmintinar sang kalimpyo kag kaluwasan sa mga sementeryo kag iban pa nga lugar nga kadtuan sa tion sang pagdumdom sa mga minatay.
