ROXAS CITY – Ginkumpirmar sang Acting Provincial Fire Marshal sang Bureau of Fire Protection – Capiz nga nag-request si Capiz Governor Esteban Evan “Nonoy” Contreras kay Bureau of Fire Protection 6 – Regional Director Senior Superintendent Jerry D Candido nga kun mahimo maka-augment ang pila ka mga bumbero sa Roxas Memorial Provincial Hospital.
Suno kay Chief Inspector Christopher Regencia, matapos naaprubahan ang nasambit nga request, gilayon nga ginpang-deploy ang pulo ka mga bumbero sa RMPH kun sa diin ginklaro sini nga lunsay tanan ang may yara sang medical background.
Suno diri nga nagaisahanon nga probinsya ang Capiz sa rehiyon 6 kun sa diin naghinyo sang pag-augment sa hanay sang BFP agud sarang nga makabulig sa nasambit nga ospital.
Mahibaluan nga ang RMPH ang gin-designar bilang COVID-19 hospital sa probinsya sang Capiz.
Gindugang pa sini nga yara na karon sa ikaapat nga semana ang pagpatigayon sang augmentasyon.
Suno kay Regencia nga wala man nasaad sa request ni Contreras kun pila ka mga bumbero ang dapat nga i-deploy kada semana.
Ginpahayag sini nga ang una nga batch nga nag-augment sa RMPH ang lunsay tanan mga bumbero nga nagikan sa Capiz samtang pag-abot sa ikaduha tubtob ikaapat na sa karon ang nagikan sa mga ka-probisyahanan sa bilog nga Western Visayas.
Suno pa diri nga ginatugyan na lamang sini sa pamunuan sang RMPH ang mando kun sa diin nga departamento sang nasambit nga ospital igapahamtang ang naga-augment nga mga bumbero.
