CAPIZ – Nagpakigbahin sang mga Bureau of Fire Protection – Capiz sang mga accomplishment sang ila talatapan sang tuig 2025.
Sa interview sang Bombo Radyo kay Senior Fire Officer 1 Joenel Cortez, Fire Arson Investigator sang Office of the Provincial Fire Martial Capiz, iya ginpahayag nga amo nga accomplishment ang na-angkon bangud sa pagbinuligay sang tanan nga katapo sang ila talatapan.
Suno kay Senior Fire Officer 1 Cortez, nagpatigayon ang ila talatapan sang pagpanghatag sang flu vaccine sa tanan nga katapo sang Bureau of Fire Protection kag blood letting program nga daku gid ang nabulig nga mapabakod ang ila sini ikaayong lawas.
Subong man, nakabaton man sila sang nagkalain-lain nga mga pagpasidungog kaangay sang top performing non local government unit kag diploma of service, tanda sang ila wala tupong nga serbisyo.
Pahayag pa niya, isa sa mga pinakadaku nga accomplishment sang ila talatapan amo ang pagbukas kag pag-ground breaking sang mga bag-o nga sub station sa San Nicolas sa banwa sang Tapaz kag Barangay Banica sa syudad sang Roxas nga daku gid ang mabulig sa pagpadasig sang pagresponde sa tion sang sunog.
Dugang pa sang natungdan, nagapadayon sa gihapon ang ila pagpahanumdom sa publiko nga ipabilin ang presence of mind kag indi magpakampante sa sulod sang panimalay ukon establisyemento bangud ang sunog ang mahimo gid nga magluntad anuman nga oras.
