Preparado na ang Bureau of Fire Protection (BFP) Capiz para sa pagpatuman sang Oplan Kaluluwa 2026 agud masiguro ang seguridad kag kaluwasan sang publiko sa tion sang pagdumdom sa mga minatay.
Sa interview sang Bombo Radyo kay Fire Senior Superintendent Eden M. Altamia-Baua, Provincial Fire Marshal sang BFP Capiz, iya ginpahayag nga sang Oktubre 12, nakasumiter na sila sang implementing plan kag deployment plan para sa nasambit nga operasyon.
Padayon man ang pagpalapnag sang impormasyon sa publiko kag koordinasyon sa nagkalain-lain nga ahensya agud masiguro ang matalunsay nga pagpatuman sang Oplan Kaluluwa.
Suno naman kay Fire Chief Inspector Arden G. Bedoña, Roxas City Fire Marshal, nagapatigayon na ang BFP Roxas City sang fire safety inspection sa mga terminal kag pantalan bilang kabahin sang ila pagpanghanda para sa pagdugok sang mga pasahero sa tion sang tigkalalag.
Ginpahayag man sini nga magapaidalom na sa Code Blue ang ila mga katapo sugod sa Oktubre 28 agud masiguro ang madasig nga pagresponde sa mga emerhensya.
Samtang, suno kay Fire Chief Inspector Rayman D. Vela, Municipal Fire Marshal sang Tapaz Fire Station, nagaplastar na ang ila istasyon sang manpower nga magagamit sa duha ka fire truck nga magalibot sa pila ka mga patyo sa banwa sang Tapaz.
Ini agud mas mapadasig ang pagresponde sang mga bumbero kon may matabo nga sunog ukon iban pa nga emerhensya sa mga lugar nga madamo sang tawo.
Nagpasalig naman ang mga opisyal sang BFP nga mangin mas visible ang presensya sang ila mga katapo sa nagkalain-lain nga lugar agud masiguro ang isa ka malinong kag hilway nga pagdumdom sa mga minatay subong nga tuig.
