ROXAS CITY – Yara karon sa blue alert status ang pamunuan sang Bureau of Fire Protection sa syudad sang Roxas kag probinsiya sang Capiz kasunod sang pagsaulog sang Christmas kag New Year’s day.
Apang suno kay SFO2 Marlon Garbo, provincial chief operation sang BFP-Capiz nga epektibo buwas nga adlaw ipahamtang na sa Red alert status ang bug-os nga pwersa sang ahensiya tobtob sa Enero 2.
Mangin panugod naman ini sang maidid nga monitoring sang talatapan, pagrekorida nga nagapahanumdum sa publiko sa ila paghalong sa sunog.
Magapatigayon man sang inspeksyon sa mga stalls nga nagabaligya sang mga palupok, agud masiguro nga indi makabaligya sang ginadumilian nga mga firecrackers ang mga vendors.
May yara man sang maga-standby nga fire truck malapit sa Premier de Mayo St., ang gindesignar nga firecracker selling area.
Pananglitan nga mapamatud-an nga nagalapas ang mga firecracker vendors sa pagsulundan posible sila nga mapasakaan sang panumbungon.
Ginpahanumdum man ni Garbo ang publiko angut sa hugot nga pagdumili sa pagpalupok sang mga firecrackers sa lugar nga wala nakapasar sa pag-inspeksyon sang PNP.
Liwat ginpahanumdum sang opisyal ang istrikto nga pagpatuman sang Executive Order No 28 sa diin nagadumili sa pagpalupok sa bisan diin na lamang nga lugar.
Samtang suno naman kay FO1 Don Anthony Falcis – public information officer sang Roxas City fire station nga ginakampanya sang talatapan ang paggamit sang pito sa baylo sang palupok agud mapalayo sa disgrasya karon nga holiday season.
Nagapanagtag man ang mga personnel sang fire safety leaflets agud mangin aware ang publiko sang mga pamaagi sa paglikaw sa sunog.
Ginpahanumdum man ni Falcis ang publiko nga tsekyaron ang ginabakal nga mga Christmas lights kag siguraduhon nga may ICC kag PS mark nga nagapatimaan nga nakaagi ini sa pagtsekyar sang Department of Trade and Industry.
Samtang partikular nga gintumod ni Falcis ang mga kabaranggayan sa syudad nga makabig fire prone areas kalakip diri ang mga coastal areas sang Culasi, Baybay, Cogon, Punta Cogon, Libas, Barra, Punta Tabuc, Barangay 1, 2, 3, 4, 5, 6 ,7, 8, 9, 11, Tanque, Lawaan kag pila ka bahin sang Banica bangud sa madamo kag ikit ikit nga mga balay.
