Naghatag sa paandam ang Bureau of Fire Protection ukon BFP sa publiko sa posible nga pagdamo sang fire incidents sa probinsya sang Capiz kadungan sang mas mainit nga panahon tuga sang ginalauman nga ‘El Niño’.
Sa interview sang Bombo Radyo kay Fire Chief Inspector Reynan Gecana, Chief sang Operations Division sang BFP Western Visayas, iya ginpahayag nga mas madasig nga maglapta ang kalayo sa tion sang dry season, ilabi na sa mga lugar nga nga madamo sang mga uga nga kahoy kag hilamon.
Suno kay Gecana, dapat likawan ang mga tikang nga mahimo umpisahan sang sunog, lakip na ang pagsunog sang basura sa open areas kag paghaboy sang upos sang sigarilyo nga posible magsugod sang grassfire.
Pahayag pa sini, dapat mangin alerto sa electrical safety sa sulod sang balay paagi sa paglikaw sa overloading sang mga outlet, pag-unplug sang appliances nga wala ginagamit, kag pagpa-check sang mga wiring. Kinahanglan man nga indi pagbay-an ang ginakaluto kag kandila nga nakasindi.
Nagpanawagan man ang natungdan nga mangin responsable kag ikabuhi ang mga precautionary measures batok sa sunog, ilabi na samtang naga-atubang sang mas mainit kag mamala nga kondisyon sa tion sang El Niño.
