Ginpakigbahin sang Bureau of Fire Protection-Roxas City ang rason sang pag-red alert status para sa grand launching sang apat ka satellite command centers.
Sa interview sang Bombo Radyo kay Senior Fire Officer 1 Junemar Galve, Chief Public Information Section sang Bureau of Fire Protection Roxas City, iya ginpahayag nga ang pagpatuman sang red alert status ang para sa pag-implementar sang preparasyon para sa grand launching sang apat ka satellite command center.
Suno kay Galve, lakip sa apat ka satellite command centers ang ginpahamtang sa region I Ilocos Region, region II Cagayan Valley , region VI Western Visayas, kag region IX Zamboanga Peninsula.
Pahayag pa niya, ang tagsa ka personnel sang BFP sa Western Visayas naka preparar para sa pag deliver sang fire safety, rescue operation kag iban pa nga emergency services.
Dugang pa niya, antes pa man mag implementar naka advance na ang fire station sang gamit sa fire truck, ambulance, kag tagsa ka personnel nga handa sa pag responde 24/7.
Nagapanawagan man sang natungdan nga unahon ang pag tawag sa hotline nga 911 sa tion sang emeheryensya agud mabuligan insigida sang BFP, PNP kag iban pa nga medical nga serbisyo ang mga nagakinahanglan sang madali nga bulig.
