Nagpakigbahin ang Bureau of Fire Protection – Roxas City, sang mga accomplishment sang ila talatapan subong nga tuig 2025.
Sa interview sang Bombo Radyo kay Senior Fire Officer 1 Junemar Galve, Chief Information Officer sang Bureau of Fire Protection- Roxas City, iya ginpahayag nga isa sa mga accomplishment sang ila talatapan amo ang pagdugang sang isa pa gid ka substation sa bahin sang Barangay Banica, Roxas City nga mas makabulig pa sa pag-responde sa tion sang sunog.
Suno kay Senior Fire Officer 1 Galve, nagnubo man ang kaso sang sunog subong nga tuig kun sa diin nakabalhag sang 31 ka kaso sang residential fire kag 10 ka kaso sang non-residential fire.
Samtang, wala man sang may na-record nga insidente sang sunog sang pagselebrar sang adlaw sang Paskwa.
Pahayag pa niya, nagapadayon man ang kampanya sang ila talatapan nga Oplan Paalala: Iwas Paputok nga nagapahanumdom sa tanan nga likawan ang paggamit sang palupok kag kun indi gid, maggamit lang sa mga gin-designar nga lugar nga malayo sa mga panimalay nga mahimo tunaan sang sunog.
Nagapanawagan man ang natungdan nga mangin aligmat kag mag doble-halong kag kun mahimo maggamit na lang sangh mga alternatibo nga pampagahod kaangay sang takop sang kaldero ukon torotot.
