Hugot nga dumilian sang Bureau of Fisheries and Aquatic Resources – Region VI ang paggamit sang fine-meshed net sa pagpangisda.
Sa interview sang Bombo Radyo kay Director Remia Aparri, iya ginpahayag nga ang nasambit nga hagna ang makabulig sa pagpadamu sang populasyon sang mga isda kag pagsiguro sang food security sang mga pumuluyo.
Suno kay Director Aparri, nagapakig-angot man ang ila talatapan sa mga local government unit kag bantay dagat sa kada probinsya agud nga makabulig sa pagbantay sang kadagatan.
Nahibaluan nga may yara sang tatlo ka bulan nga ginpatigayon nga fish ban sa bahin sang Visayan Sea agud nga matagaan sang kahigayunan nga makapadamu ang mga isda ilabi na ang mackerel, sardines kag herrings nga bugana sa Western Visayas.
Nagpanawagan man ang natungdan sang kooperasyon sang publiko nga mag-ugyon sa pagproteher sang mga dunang manggad sang kadagatan.
INTERVIEWED BY: BOMBO LYND-C JOY BADE VIA BOMBOHANAY SA UDTO
