Wala ginadula sang Bureau of Immigration ang posibilidad nga nakagwa na sa Pilipinas ang senador, kasunod sang iya nauna nga paghalin sa Senate custody.
Suno kay Dana Sandoval, bukas gihapon ang posibilidad nga may ginagamit nga mga “backdoor channels” ukon tago nga mga alagyan pakadto sa guwa sang pungsod pareho sang mga malayo nga pantalan.
Ginpahayag niya nga pirmi ginakonsiderar sang BI ang amu nga anggulo sa kada may kaangay nga sitwasyon.
Apang ginpasiguro ni Sandoval nga hugot ang pagbantay sa mga ginakabig nga illegal migration corridors pinaagi sa bulig sang Philippine National Police, Philippine Coast Guard kag mga local Government.
Dugang pa niya, kun may posible nga pagpalagyo ukon paglikaw, gilayon nga ginapaalerto ang BI lakip na ang pagkilala sang mga indibidwal nga nadakpan ukon naharang, labi na kun mga pangayaw ini.
Base sa opisyal nga rekord sang BI, wala pa sang may nabalhag nga rekord nga naggwa sa pungsod si Sen. Dela Rosa.
Ginpasiguro man ni Sandoval nga kun makita si Dela Rosa sa mga paluparan, gilayon ini nga ipahibalo sa mga law enforcement agencies para sa nagakaigo nga aksyon.
