ROXAS CITY – Gin-athag sang talatapan sang Business Permit and Licensing Division sang siyudad nga ginadumilian sa gihapon ang pag-operate sang mga KTV Bar sa siyudad apisar nga may yara na sang license to operate.
Ini ang ginpahayag ni City Licensing Office head Roselyn Estrebilla sang mainterview sang Bombo Radyo.
Suno kay Estrebilla nga wala sang licence to operate ang Groogy KTV Bar sa Barangay 3 sining siyudad apang wala sila sang ideya nga padayon sa gihapon ini nga naga-operate sa siyudad.
Ginpahayag sini nga nagapatigayon man sila sang surprise inspection kaupod ang katapo sang mga kapulisan sa mga KTV Bars nga naga-operate sa siyudad.
Dugang pa sini nga indi malikawan nga may yara sa gihapon sang mga tag-iya sang mga KTV Bars nga wala nagasunod sa pagsulundan bangud may yara sa gihapon sang mga naga-operate.
Ilabi na subong nga yara sa idalom sang Modified General Community Quarantine (MGCQ) ang probinsya kag hugot sa gihapon nga ginapatuman sang National Inter-Agency Task Force ang liquor ban sa pungsod.
Ginkompirmar man sini nga nagapakig-angut man sila sa tanan nga mga opisyales sang barangay agud temporaryo anay nga dumilian ang mga KTV Bars nga naga-operate sa ila mga teritoryo ukon lugar.
Matandaan sang damlag lang may yara sang natabo nga insidente sa Groogy KTV Bar kun sa diin ginbuno patay si Punong Barangay Ruben “Godo” Fuentes sang duha ka mga ex-covict kag construction workers nga sanday Virgilio Vigor kag Joseph Jamora nga lunsay mga residente sang probinsya sang Iloilo.
