ROXAS CITY – Nagapati ang isa ka propesor nga kinahanglan iselebrar ang Buwan ng Wika indi lamang kada bulan sang Agosto, kundi sa bug-os nga tuig.
Ini ang ginpahayag ni Professor Teresita ‘Terry’ Katigbak, sang mainterview sang Bombo Radyo.
Suno diri, agud mapataas ang lebel sang ihibalo sang mga Filipino sa aton kaugalingon nga linggwahe, kinahanglan nga engganyuhon ang mga nagkalain-lain nga ahensiya pampubliko man ukon pribado nga magpartisipar sa selebrasyon sang ‘pampungsodnon nga linggwahe ukon Pambansang Wika.
Dugang pa diri ang pagpasangkad sa paggamit sang linggwahe nga Filipino pinaagi sa written literature kag ang paghiwat sang aktibidad ukon programa nga makapadugang sa pag-apresyar ukon pagpalangga sang aton kaugalingon nga linggwahe.
Suno pa kay Katigbak, nga indi kuntani pagkalimtan sang pumuluyo ang halambalaon sa tagalog nga “Ang hindi marunong lumingon sa pinanggalingan, hindi makakarating sa paroroonan” nagakahulugan nga kinahanglan nga balikdon ta ang aton ginhalinan kag ikabuhi ang linggwahe nga Filipino.
