ROXAS CITY– Magapatigayon sang hublag protesta ang mga progresibo nga grupo sa Western Visayas bilang pagpakita sang ila nga suporta sa pag-atubang ni Department of Agrarian Reform Sec. Rafael “Paeng” Mariano sa Commission on Appointments buwas.
Sa interview sang Bombo Radyo kay Mr. Chris Chavez, coordinator sang Anak Pawis sa Rehiyon 6 nga magatipon-tipon ang tanan nga progresibo nga grupo agud magpanawagan sa CA nga aprubahan ang appointment ni Mariano.
Ginapanindugan ni Chavez, nga labi nga mabuligan ni Mariano ang mga mangunguma sa Pilipinas kun ini na ang magapungko nga bilang tiglikum sang ahensiya bangud sa mga plano sini nga makahatag sang kaayuhan sa patag sang agrikultura.
Ginpahayag pa sini nga sa tion nga maaprubahan ang appointment ni Mariano mahatagan na sang katumanan ang madugay nga handum sang mga mangunguma nga makabaton sang libre nga duta nga umhan.
Nagapati man si Chavez nga mapasiguro man ni Mariano nga makabaton sang bulig ang mga mangunguma sa gobyerno agud ila pa mapaayo ang gina-uma nga duta.
Kumpyansa man ang mga ini nga aprubahan sang CA ang appointment ni Mariano bangud sa nahimuan sini sa ahensiya kag sa mga mangunguma sa sulod sang isa ka tuig nga pagpungko sa pwesto.
Nahibaluan gikan kay Chavez nga magaupod man sa ila nga hublag protesta buwas nga adlaw ang mga lokal nga empleyado sang DAR sa Western Visayas kag mga miyembro sang progresibo nga grupo.
