MANILA, Philippines – Nagpahanumdom ang Civil Aviation Authority of the Philippines ukon “CAAP”, sa publiko nga ginadumilian kag magapangatubang sang penalidad ang pagpasiga sang laser beam kag iban pa nga masanag nga suga pakadto sa eroplano.
Suno sa CAAP, ang laser illumination mahimo magresulta sa pagkadisturbo sang panan-aw sang piloto, labi na sa kritikal nga bahin sang pagpalupad kag pagpanaug sang eroplano.
Ginsambit sang ahensya ang Philippine Civil Aviation Regulations, nga nagadumili sa sin-o man nga tuyoon nga magtudlo sang laser beam ukon high-intensity light sa eroplano bangud mahimo ini magtuga sang distraction, dis-orientation kag iban pa nga peligro sa flight crew.
Sa idalom naman sang Republic Act No. 9497, mahimo mapatawan sang kapin tatlo ka tuig nga pagkabilanggo, multa nga indi magnubo sa P50,000 kag indi man magsobra sa P500,000, ukon pareho nga silot ang mapamatud-an nga naglapas sini nga probisyon.
Samtang, ginpahanumdom man sang CAAP nga hugot nga ginaregular ang iban pa nga peligroso nga aktibidad sa palibot sang mga paluparan kag operational areas.
Lakip diri ang wala sang awtorisasyon nga pagpalupad sang aerial objects, pagpadamo sang mga sapat nga mahimo magdulot sang bird strike, pagsulod sang mga sapat sa airport premises, wala sang permit nga construction, wala nagakaigo nga pagdumala sang mga kahoy, tanom, kag mga aktibidad nga mahimo makaapekto sa aviation communication kag navigation systems.
