ROXAS CITY – Wala ginakunsinti sang Civil Aviation Authority of the Philippines (CAAP)-Capiz ang pagpick-up sang pasahero sang mga colorum drivers sa Roxas City Airport.
Ini ang may kaangtanan sa reklamo sang mga lehitimo nga mga tricycle drivers kay City Councilor Reynaldo Magallanes nga daw kaangay colorum drivers na ang nagadominar sa nasambit nga pahugpaan.
Sa ginpatigayon nga committee hearing, ginklaro ni Mr. Monico Basallote, Airport Manager II, nga nakasentro ang ila nga jurisdictions sa premises sang pahugpaan kag wala na nalakip diri ang pagbantay sa mga colorum drivers nga nagapick-up sang pasahero.
Suno diri, mabudlay para sa ila matumod kun lehitimo ukon indi ang traysikol nga nagasulod sa airport kag indi mahimo nga balibaran ang pagsulod sini ilabi na kun may yara sang pasahero nga ginadul-ong.
Nagapati si Basallote nga posible na misinterpret sang katapo sang RAPTODA ang pagguwa-sulod sang mga colorum nga traysikol sa airport kag ginklaro nga wala sini ginakunsinti ang pagbiyahe sang colorum kag pagpasakay sang pasahero.
Ginkasubo man sang opisyal ang ang pagkaulamid sang ila talapatan sa amu nga isyu bangud nakafocus sila sa pagpakamaayo sang serbisyo pag-abot sa airport.
Sa pihak nga bahin, nakasugtanan sang mayorya ang regular nga pagpahamtang sang traffic auxiliaries sa amu nga lugar agud masiguro nga makabiyahe sang maayo ang mga lehitimo nga tricycle drivers kag indi maliwat ang kaangay nga hitabo.
