ROXAS CITY – Mas nangin ‘united’ pa ang mga Canadians sa pagsuporta sa Toronto Raptors nga nagahandom nga makuha ang kampeonato sa NBA finals batuk sa defending champion nga Golden State Warriors.
Sa report ni Bombo international correspondent Zairah Joy Andrade, tumandok sang Roxas City, Capiz nga nakaba-se sa karon sa Toronto, Ontario, Canada, ginpahayag sini nga nagapabilin nga positibo ang mga taga-Canada nga madaog ang Raptors sa pihak sang homecourt advantage sang Warriors sa Game 6.
Bangud suno sa iya sa labing-una nga kahigayunan nga pag-abanse sang Raptors sa NBA finals sa kabug-usan sang ila franchise history, malipayon ang mga Canadians kag mas ginpakita pa ang ila suporta bilang isa ka estado.
Makapalanindog sang balahibo suno kay Andrade ang ginpakita nga pag-ugyon sang mga Canadians sa dululungan nga pagkanta sang ‘O Canada’ antes nagsugod ang Game 5 kun sa diin dimalas nga nalutos ang Raptors.
Mahibaluan nga ginpierdi sang Golden State ang Toronto sa Game 5 agud i-extend ang serye sa score nga 106-105.
Balantayan naman ang Game 6 sa Biyernes, Hunyo 14, sa homecourt sang GSW.
