DAO CAPIZ – Gin-ako ni Dao Candidate Mayor EJ Griño, nga anay siya nga nagagamit sang illegal nga droga apang 10 na ka tuig ang nakaligad.
Ini kaangut sa naguha nga isyu duha ka adlaw matapos ang iya pag-file sang certificate of candidacy sa pagka-Mayor sa ila banwa.
Sa interview sang Bombo Radyo kay Griño, ginsiling sini nga sadto nga tion nadala lamang siya sa pagkabatan-on apang gilayon man niya ini nga gin-untatan matapos mahibaluan ang indi maayo nga resulta sa ikaayong lawas.
Suno kay Griño, wala niya ini ginapanginwala apang sa karun liwat na naman nga ginabuhi sang mga tawo nga nagakontra sa iya matapos magapapili sa nasambit nga pwesto.
Bangud sini, maisog ini nga nagpanghangkat sa mga tawo nga nagasamad sang iya pangalan nga magpaidalum sa drug test agud mapamatud-an nga matuod ang iya ginahambal.
Nadismaya man ini matapos gina-intrahan kag ginasulod ang mga isyu sang ila pamilya nga kun tani pabay-an na lamang ini kag ipabilin nalang nga malinong kag matawhay ang eleksyon sa ila banwa.
