ROXAS CITY – Gin-isa-isa ni Dr. Cheyz Descalsota Veterinarian III sang Office of the Provincial Veterinary, kung anu ang kinalain kag mga dapat himuon sat ion nga may yara sang Canine parvovirus kag Canine Distemper ang ginahuptan nga sapat partikular ang ido.
Sa interview sang Bombo Radyo kay Descalsota, ginpahayag sini nga ang canine parvovirus ukon mas kilala sa tawag nga parvo isa ka malala kag makahalawa nga sakit sang mga ido.
Ang parvo virus, madasig nga nagadamo sa lawas kag cells sang mga ido kag masami nga gina-igo ang bituka sang sapat, gina-atake sini ang white blood cells kung ang apektado nga ido tutoy pa lamang.
Suno kay Descalsota, pila sa mga sintomas sini amu ang;
*Severe bloody diarrhea ukon tuman nga paghigko nga may dala nga dugo
*Pagpangluya
*Mataas nga hilanat
*Madasig nga pagnubo sang bug-at
*Pagpalanuka
Bangud dala ini sang virus, ang sakit nga parvo indi sarang mabulong sang anu nga sahi nga bulong bangud nagadula lamang ini sa sulod sang pila ka adlaw ukon semana.
Apang agud mabalik ang nadula nga electrolyte sa lawas sang sapat, nga mangin epekto sang dehydration nagakinahanglan ini sang intravenous fluids nga may yara sang electrolytes, Antibiotic kag anti-inflammatory naman ang ginahatag agud makontrol ang septicaemin, Antispasmodic drugs naman agud mapunggan ang padayon nga pagpalanuka.
Ang Distemper naman ukon Canine Distemper , isa ka sahi sang sakit sa ido, apektado sini ang digestive system, respiratory system, Nervous system (Brain and nerves) Immune System kag Integumentary System (Skin).
Mahimo ini nga makuha sa kontaminado nga hangin, higko kag ihi sang ido, mga butang kaparehas sang bowls, hampangan, tsinelas kag iban pa.
Suno kay Descalsota, nakuha ini sang sapat pinaagi sa airborne and droplet transmission, direct contact sa infected nga ido, indirect contact ukon madilaan ang contaminated nga tawo, higko ukon gamit.
3-21 days ukon masobra pa incubation period sang Distemper, pagkatapos sini magaguha na ang mga sintomas sang sakit kaangay sang lagnat, pagpangluya, wala sang gana sa pagkaon, diarrhea, madakmol nga discharge sa mata kag ilong, ubo, pagpalangdakmol sang panit sa ilong kag foot pads, neurological signs kaparehas sang involuntary movements, pagpalangurog, muscle twitching, paralysis, kag pagkabulag. Agud malikawan ang mga nasambit nga sakit, panugyan sang Veterinarian ipabilin nga matinlo ang palibot, pagkaon, tubig kag regular nga magdis-infect sang hangin kag palibot, likawan nga ilagaw ang mga hinupatan kung indi pa ini kumpleto sa bakuna, pabakunahan sa veterinarian clinic as early as 6 weeks old.
