Ginklaro sang Capiz Electric Cooperative ukon CAPELCO nga yara sa ₱17.96 kada kilowatt-hour ang insakto nga rate sang kuryente sa Capiz para sa bulan sang Nobyembre, kag indi ₱18.40/kWh nga nagalapta online.
Sa interview sang Bombo Radyo kay Kenneth Emmanuel Tipon, Admininstrative Chief sang Capelco, iya ginpahayag nga yara lang sa ₱17.96 ang billing rate sa Capiz, sa diin dala na diri ang VAT apang, kun wala naman sang VAT, yara lamang sa ₱16.96.
Suno kay Tipon, may yara sang basihan ang amo nga rate bangud ginaregulate ini sang mga electric cooperative sang nagakaigo nga ahensya sang gobyerno.
Dugang pa sini,, ang taripa ukon rate sang kuryente ginabase sa mga regulasyon sang Energy Regulatory Commission (ERC) nga amo ang ginasunod sa pagkwenta sang billing sang mga konsumidor.









