Ginkumpirma ni Engr. Edgar Diaz sang Capelco ang pagnubo sang 77 centavos per kilowatt hour sa electric bill subong nga bulan sang Mayo.
Suno kay Diaz nga nangin factor sa pagnubo sang 77 centavos per kilowatt hour ang pagnubo sang pass on charges sang mga power supplier sa mga distribution companies kasubong sang Capelco kag ang pagreduce sa pagpaandar sang transformer sa Panitan substation humalin sa 14 oras nga operasyon karon nangin tatlo ka oras na lamang kada adlaw ang paggamit sini.
Nahibaluan nga madamo sang holiday sang nagligad nga bulan sang Abril gani nagnubo man ang kunsumo sa kuryente.
Ginpahayag pa ni Engr. Diaz kun manubo ang presyo nga ginahatag sang supplier, manubo man ang ginahatag sang Capelco sa ila mga kunsumidor.
Samtang sabat ni Engr. Diaz ang isyu angut sa disconnection letter kag pagpang-utod sa indi maka-settle sang ila balayaran sa kuryente.
Suno sa opisyal sang Capelco nga indi magpang-utod ang lineman apisar pa nga may disconnection letter na nga nabaton ang kusumidor kun wala sang tawo ang balay.
Mismo ang meter reader nga na-assign sa isa ka lugar ang nagadala sang disconnection letter sa member-consumer nga wala pa nakabayad sang ila electric bill.
Ginahatagan sang 48 oras ang mga kusumidor nga bayaran ang ila bill sa diin kun sa sulod sang duha ka adlaw kag indi pa sila makabayad, ginakadtuan sang lineman ang tagbalay kag gina-imporma nga pagautdan na sila sang kuryente.
Ginpahayag ni Diaz nga nagapaidalum sa orientation ang disconnection team antes sila i-dispatch gin-aasign nga lugar.
Klaro suno kay Engr. Diaz ang protocol sang talatapan nga indi magpag-utod sang kuryente sang kunsumidor nga may yara na sang disconnection letter kun wala sang tawo ang balay.
Ginhangkat man sini ang nagareklamo nga magpadulong sa iya talatapan agud iya mahibaluan kun sin-o nga personnel ang nagalapas sa pagsulundan sang CApelco pag-abot sa pagpang-utod sang kuryente.
