CAPIZ – Ginpatpat sang Capiz Electric Cooperative (CAPELCO) ang ila standard operating procedure (SOP) matapos mabaton ang impormasyon sang pagkakuryente-patay sang isa ka menor de edad sa Barangay Dumulog, Roxas City.
Ang biktima amo si alyas Angel, 17 anyos, residente sang New Road, Banica, Roxas City.
Sa interview sang Bombo Radyo kay CAPELCO General Manager Engr. Edgar Diaz, iya ginpahayag nga
kun may yara sang impormasyon nga mabaton ang kooperatiba tuhoy sa pagkakuryente ukon kaangay nga insidente, gilayon nga ginakadtoan sang personnel ang lugar agud ma-assess ang sitwasyon.
Suno kay Diaz, ang una nga tikang amo nga i-inspect ang pasilidad sang CAPELCO, lakip na ang poste sang kuryente kag power lines, agud madetermina kun may nagguba nga poste, wire, ukon ano man nga pagkaguba sa distribution system sang kooperatiba nga mahimo rason sang insidente.
Kun may yara sang makit-an nga hazard, gilayon nga ginapatay ang linya sang kuryente agud malikawan ang dugang nga peligro.
Apang sa pag-inspect sang CAPELCO sa Barangay Dumulog, nakit-an nga intact ukon normal nga naga-operate ang tanan nga pasilidad, wala sang may nagguba nga poste ukon wires.
Gin-athag man sang natungdan nga ang responsibilidad sang CAPELCO ang tubtob lang gid sa electric meter sang konsumidor samtang responsable naman sang property owner ang electrical wiring, kag outlets nga yara sa sulod sang perimeter sang propedad.
Ginpahayag ni Engr. Diaz nga importante ang pagbutang sang warning signs sa mga lugar nga may electrical hazards agud malikawan ang mga aksidente.
