CAPIZ – Madugay na nga may accident insurance ang mga linemen sa talatapan sang Capiz Electric Cooperative (CAPELCO).
Sa interview sang Bombo Radyo kay Engineer Edgar Diaz, General Manager sang Capiz Electric Cooperative (CAPELCO), iya ginpahayag
nga duha tubtob tatlo ka tuig na ang nakaligad sang suguran ang paghatag sang nasambit nga insurance nga mahimo maka-cover sang tubtob P200,000.
Suno sa iya, tinutuyo sang amo nga insurance ang makabulig sa tanan nga regular linemen sang talatapan sa oras sang pagkinahanglan bangud sang mataas nga risgo sang trabaho.
Pahayag pa niya, may yara sang 71 tanan ka mga linemen ang Capiz Electric Cooperative (CAPELCO) kun sa diin 56 diri ang regular kag 15 naman ang provisionary.
Nahibaluan nga gin-aprubahan na sang House of Representatives sa ikatlo kag ulihi nga pagbasa ang House Bill No. 7239 ukon ang“Line Workers Insurance and Benefits Act” na magahatag sang mandatory insurance coverage sa libo-libo ngang electrical kag telecommunications line workers sa bansa.
Gin-athag man sang natungdan nga libre ang amo nga insurance kag indi pag-ipasa ang charges sa mga konsumidor.
INTERVIEWED BY: BOMBO ROADNIE DALANON
