ROXAS CITY-Magapatigayon sang press conference ang Capiz Electric Cooperative, Inc. (CAPELCO) buwas, Setyembre 18, 2026, alas-10:00 sang aga sa CAPELCO Board Room, CAPELCO Building, Roxas City, Capiz, agud pagahisgutan ang nagapadayon nga krisis sa suplay sang kuryente kag ang pagsaka sang bayranan sa kuryente sang mga member-consumers.
Pangunahan ini ni Engr. Edgar Diaz, Acting General Manager sang CAPELCO, kag paga-atubangon sa amo nga press conference ang mga pamangkot kag kabalaka sang publiko kag media nahanungod sa sitwasyon sang kuryente sa Capiz.
Katuyuan sang CAPELCO nga makahatag sang insakto, klaro kag tayuyon nga impormasyon sa mga media kag member-consumers nahanungod sa mga rason sa likod sang nagapadayon nga problema sa suplay sang kuryente, pati na ang mga kabangdanan sang pagtaas sang electric bill.
Ginalauman man nga mahatagan sang katin-awan ang mga isyu nga direkta naga-apekto sa mga konsumidor, lakip ang presyo sang kuryente, suplay kag demand, transmission kag generation charges, kag iban pa nga factors nga may epekto sa kabug-aton sang bayranan sang mga panimalay kag negosyo.
Sa pihak sini, ginapaabot ang paghatag sang CAPELCO sang mas klaro nga pagpaathag kag impormasyon sa publiko nahanungod sa kasamtangan nga sitwasyon kag sa mga tikang nga ginahimo agud maatubang ang mga problema sa suplay kag mabaton sang mga konsumidor ang husto nga impormasyon nahanungod sa ila ginabayran nga kuryente.
