ROXAS CITY, CAPIZ- Ginakabig sang Capiz Electric Cooperative, Inc. (CAPELCO) nga importante ang ginaprobahan nga bag-o nga legislative franchise agud masiguro ang padayon nga operasyon kag pagserbisyo sang electric distribution utility sa mga konsumidor sa bug-os nga Capiz.
Ini ang ginpahayag ni CAPELCO General Manager Engr. Edgar Diaz sa interview sang BOMBO RADYO Roxas, kasunod sang pag-uswag sang House Bill No. 5793, nga nagatutuyo nga hatagan sang prangkisa ang CAPELCO para magpatindog, magpanag-iya, magpadalagan, magdumala kag magmintinar sang distribution system sang kuryente sa Roxas City kag 16 ka banwa sang probinsya.
Suno sa ginaduso nga franchise, sakop sini ang Roxas City kag ang mga banwa sang Cuartero, Dao, Dumarao, Dumalag, Ivisan, Jamindan, Maayon, Mambusao, Panay, Panitan, Pilar, Pontevedra, President Roxas, Sapian, Sigma kag Tapaz.
Ang bag-o nga prangkisa ginatan-aw nga importante bangud ang CAPELCO amo ang distribution utility nga naga-serbisyo sa amo nga mga lugar. Sa rekord sang Energy Regulatory Commission, sakop sang CAPELCO ang amo nga mga lugar sa probinsya kag nagaserbisyo bilang distribution utility sang kuryente.
Samtang, ginahatagan man sang atensyon ang epekto sang prangkisa sa kalidad kag pagkakasaligan sang serbisyo, ilabi na sa pagpalapad kag pagpaayo sang distribution facilities, pag-atubang sa nagadugang nga demand sang kuryente kag pagpasanyog sang serbisyo sa mga konsumidor.
Para kay Diaz, ang paghatag sang legislative franchise indi lamang ini parte sang legal nga mandato sang CAPELCO kundi isa man ka importante nga tikang agud mapadayon ang responsibilidad sang kooperatiba sa paghatag sang luwas, kasaligan kag padayon nga suplay sang kuryente sa mga Capiceño.
Ginalauman nga ang padayon nga pag-uswag sang franchise measure magahatag sang mas malawig nga kasiguruhan sa operasyon sang CAPELCO kag magasuporta sa pagpaayo sang electric distribution system sa probinsya.
