Nagpahanumdom ang Capiz Electric Cooperative ukon CAPELCO sa tanan nga consumers nga nagagamit sang solar panel sa bug-os nga probinsya nga kinahanglan magpahibalo sa ila opisina agud masiguro ang seguridad sang koneksyon sa kuryente kag malikawan ang posible nga aksidente.
Ini kasunod man nagadamo nga nagagamit sang solar panel sa probinsya nga sa diin yara na ini sa 229 ka mga households kag business establishments.
Sa interview sang Bombo Radyo kay Engr. Edgar Diaz, General Manager sang Capelco, iya ginpahayag sa amo nga numero 175 ang na-record nga yara sa Roxas City.
Suno kay Diaz, kinahanglan nga may net metering ang mga consumers nga may solar panel.
Ang net metering program amo ang pag-ilis sang ordinaryo nga metro sang espesyal nga metro nga makarehistro sang kuryente nga nagasulod kag nagaguwa sa puluy-an ukon establisemento.
Paagi sa amo nga programa masiguro nga luwas kag organisado ang distribusyon sang kuryente sa bug-os nga probinsya sang Capiz.
