ROXAS CITY – Nagpaathag ang pamunuan sang Capiz Electric Cooperative (CAPELCO) natuhoy sa hinali nga pagsaka sang electric bill sang mga konsumidor sini.
Suno kay CAPELCO-General Manager Edgar Diaz, ba-se sa ila nga pag-monitor, nagsaka sang halos P800, 000 kada-adlaw ang consumption sang talatapan sini nga bulan sang Abril.
Sa ila nga pag-usisa, natukiban nga ang dako nga pagsaka sang daily consumption sa supplier nga ginakuhaan sang CAPELCO amo ang mga residential users ukon consumers.
Ini bangud halos nagsarado naman ang dalagkuan nga mga establisyemento, malls, government offices kag iban pa.
Ginpahayag pa sini posible dako man nga rason sang pagsaka sang daily consumption sang kuryente sang isa ka konsumidor bangud sa mainit nga panahon.
Suno pa diri nga bangud yara kita karon sa ‘unusual’ nga sitwasyon, posible nga may mga pang-adlaw-adlaw nga buluhaton ang isa ka persona nga indi kinaandan sa iya pang-adlaw-adlaw nga ginahimo sang wala pa nagpangatubang sa coronavirus disease (COVID-19) pandemic.
Ginpanindugan man ni Diaz nga ang CAPELCO ang 100 porsyento nga nagabakal lamang sang suplay sang kuryente sa mga power supplier agud mapun-an ang consumption sang mga konsumidor.
Gindugang pa ni Diaz nga ang electric bill sa bulan sang Marso kag Abril ang mahimo mabaydan sang mga konsumidor sang apat ka hugnat tubtob sa maimpasan niya ini tubtob sa bulan sang Agosto.
