ROXAS CITY – Natalana nga magpadulong sa Nobyembre 14, Sabado nga adlaw ang Capiz Environment and Natural Resources (CAPENRO) kag Capiz Governor Esteban Evan Nonoy Contretras agud ipaintiendi sa mga pumuluyo ang katuyuan sa pagpatindog sang Ecological Solid Waste Management sa Barangay Acbo, Sigma, Capiz.
Ini ang ginkompirmar ni Mayor Christopher Andaya sang mainterview sang Bombo Radyo.
Suno kay Andaya nga antes ini ginduso ang nasambit nga plano ginpaintiendi kag ginhinalaan na nila ini sang lokal nga gobyerno.
Ini may kaangtanan sa plano nga pagbakal sang probinsya sa amo nga lote para patindugan sang Ecopark kun sa diin ang mga basura nga dal-on diri ang iga-recycle ukon sarang mabaligya kag mahimo pa maggamit bilang organic fertilizer ukon farming gamit ang isa ka machinery sang technical working group.
Ginpahayag ni Andaya nga madamo sa gihapon nga mga residente ang nagapamalabag sa amo nga plano sang gobyerno probinsyal.
Dugang pa sini indi ini matawag nga sanitary landfill bangud isa ini ka Ecological Solid Waste Management kun sa diin makabulig pa ini sa mga tawo.
Mahibaluan nga madamo nga mga residente ang nagpamatuk sa nasambit nga plano apang aminado man ang amo nga alkalde nga bisan siya mismo indi niya luyag nga magpatindog sang Sanitary Landfill sa amo nga lugar.
Apang, naintiendihan man sini ang tinutuyo sang probinsya kag CAPENRO nga pagpatindog sang Ecological Solid Waste Management.
Matandaan nga una na ini ginpaintiendi sa mga tawo apang madamo sa gihapon ang nagapamatuk.
