CAPIZ-Nagpatigayon ang Capiz Provincial Environment and Natural Resources Office (CaPENRO) sang Information, Education, and Communication (IEC) Campaign parte sa importansya sang mga bakhaw ukon mangroves kag climate change para sa mga mag-aaral sang Culasi Elementary School sa Barangay Lonoy, banwa sang Sapian, Capiz, sang Oktubre 30, 2026.
Ang aktibidad kabahin sang padayon nga panikasog sang Provincial Government of Capiz, sa pagpanguna ni Governor Fredenil H. Castro, nga mapalapnag ang ihibalo kag kaalam sang mga kabataan parte sa pag-amlig sang palibot kag pagpreserbar sang natural nga mga manggad sang probinsya.
Sa iya mensahe sang pag-abri, ginpahayag ni Dr. Maria Nimfa Aniar, school principal sang Culasi Elementary School, ang importansya sang paghatag sa mga estudyante sang kahigayunan nga mahangpan kag maapresyar ang nagakaigo nga pag-amlig sa kinaiyahan.
Sa tion sang kampanya, gintudluan ang mga mag-aaral parte sa importante nga papel sang mga mangroves sa pagpanalipod sa mga komunidad sa baybayon batok sa mabaskog nga balod kag bagyo, paghatag sang puluy-an sa nagkalain-lain nga klase sang mga sapat-dagat, kag pagmentinar sang balanse sang ekosistema.
Ginhisgutan man ang climate change, ang mga nagapanguna nga rason sini kag ang nagkalain-lain nga epekto sa palibot kag sa pangabuhi sang mga pumuluyo.
Ginpabutyag man sa mga kabataan nga ang simple nga mga tikang pareho sang pagtanom sang kahoy, husto nga pagdumala sang basura kag pagtipig sang natural nga mga manggad may daku nga mabulig agud mapanalipdan ang kinaiyahan kag mapalig-on ang kahandaan sang mga komunidad batok sa epekto sang climate change.
Pinaagi sa amo nga kampanya, ginatinguhaan sang CaPENRO nga mapukaw ang kaamgohan sang mga kabataan kag mapadasig sila nga mangin responsable nga manug-amlig sang palibot, bangud ang pagpanalipod sa kinaiyahan nagasugod sa husto nga ihibalo kag nagapadayon paagi sa aktuwal nga aksyon.
Ginpabutyag man nga ang mga kabataan subong amo ang paglaum nga mangin mga kampeon sang pag-amlig sa kinaiyahan sa palaabuton.
