Nagalaom si Capiz 1st District Board Member Dr. Cesar Yap Jr., nga ma-aprubahan ang House Bill No. 8474, nga may tinutuyo nga i-upgrade ang Roxas Memorial Provincial Hospital sa Barangay Lanot, Roxas City bilang isa ka Level III General Hospital nga pagapangalanan nga Capiz Medical Center.
Sa interview sang Bombo Radyo kay Yap, iya ginpahayag nga nagakinahanglan gid sang mas maayo kag mas mabaskog nga serbisyo sa ikaayong lawas ang probinsya sang Capiz.
Suno kay Yap, isa sa mga nagapanguna nga problema nga ginapangatubang sang mga ospital sa Capiz amo ang kakulang sang kapasidad kag pagserbisyo sa nagadamo nga mga pasyente.
Ginpahayag man sini nga kun mangin Level III General Hospital ang Roxas Memorial Provincial Hospital, mas mapalapad pa ang serbisyo medikal kag mapauswag ang pag-atipan sa mga pasyente.
Ini agud masiguro makapauli ang mga pasyente nga may paglaom kag yuhom sa ila mga guya bangud sang maayo nga pag-atipan kag dedikasyon sang mga healthcare workers.
