ROXAS CITY – Gin-aku ni Capiz 1st district Congressman Emmanuel ‘Tawi’ Billones Sr. nga wala pa gid nakapakigsapol sa iya ang alkalde sang banwa sang Pilar.
Sa exclusive interview sang Bombo Radyo kay Billones, ginpahayag sini nga wala pa sila nakahinun-anon ni Mayor Arnold Perez apisar nga makapila ka beses na ini nagbalik-balik sang bisita sa probinsiya.
Suno diri nga nagapabilin nga maayo ang iya nga relasyon sa mga alkalde sang mga kabanwahanan sa premier-distrito kun sa diin gina-imbitar niya ang mga ini sa isa ka ‘lunch meeting’ sa iya tagsa ka pagpauli.
Diri suno sa kongresista ila ginahinalaan ang mga plano sang tagsa ka mga banwa kag kun ano ang iya matan-ay nga bulig para sa ila.
Apang si Perez lamang suno diri ang wala nagapabutyag sang interes nga magpakigsapol sa iya.
Nagapati si Billones nga si Perez dapat ang una nga magpabutyag sa iya sang interes sang pagpakighinala bangud ini ang may ihibalo kun ano ang problema kag kinahanglanon sang banwa sang Pilar.
Apang sa pihak sini suno kay Billones, madamo siya sang mga proyekto nga ginpain para sa Pilar.
Sa pagkamatuod suno diri, nagalab-ot sa 120 milyones pesos ang ginpain sini nga pondo para sa amo nga banwa sini nga tuig 2020.
Kalakip diri suno sa iya ang bypass road nga ginpondohan sang kapin 35 milyones pesos nga magasakop sa Cayus, Yating kag San Silvestre, karsada padulong sa Hinulugan Falls nga may pondo nga 20 milyones pesos, multi-purpose halls kag covered courts.
Nagapabilin naman nga bukas si Billones pananglitan magpabutyag sang iya interes nga magpakighinala ang alkalde sang Pilar sa iya.
