ROXAS CITY – Ginklaro ni Capiz 1st district congressman Emmanuel Tawi Billones Sr. nga wala sang kamatuoran ang nagalapta nga impormasyon nga wala sila nagaayuhay sang iya kaalyado nga si anay interior secretary Mar Roxas.
Suno kay Billones nga nagapabilin nga maayo ang ila relasyon ni Roxas kag ang ila nga respeto sa isa kag isa.
Indi naman mapat-od ni Billones kun sin-o ang yara sa likod sang pagpalapta sang kasubong sini nga impormasyon kag kun ano ang motibo sini.
Apang suno kay Billones, wala sang pagbag-o sa ila hugot nga relasyon ni Roxas bangud sa pagkamatuod suno diri, halos semana-semana sila kun magkit-anay kag nagahinalaay natuhoy sa bulig nga ila mahatag sa mga taga-premier distrito sang probinsiya sang Capiz.
Samtang wala naman sang nakita nga problema si Billones sa masako nga pagbisita ni Capiz 2nd district Fredenil Oto Castro sa premier-distrito sang probinsiya.
Suno sa kongresista nga indi naman sang iban sa iya si Castro kag nahibaluan sini nga luyag lamang ni Castro nga makabulig man sa mga pumuluyo sa premier-distrito.
Anuman suno sa iya nga bulig ang igahatag ni Castro sa 1st district sang Capiz ang iya hugot nga pasalamatan.
Ginpanindugan man ni Billones nga mangin siya ang handa man nga magbulig sa segundo-distrito bangud sa ngalan sang serbisyo-publiko, nagakadapat lamang nga buligan ang tanan nga Capizeño bisan diin pa ini nga distrito.
