ROXAS CITY – Nakahanda si Capiz 1st district Congressman Emmanuel ‘Tawi’ Billones Sr. nga patung-an ang mga lot owners kag Department of Public Works and Highways (DPWH) agud maresolbar ang problema sa indi pagkasugot sa presyo sang duta nga maapektuhan sa amo nga proyekto.
Suno kay Billones nga bukas siya para sa amo nga butang bilang bulig man agud dalayon na nga mapadayon ang proyekto nga madugay na kuntani natapos.
Ginpahayag sang kongresista nga paga-estoryahon niya ang mga tag-iya sang duta kun pila ang ila luyag nga presyo sang ila duta kag ipalab-ot niya ini sa DPWH.
Kun masarangan man lang sang DPWH ang kantidad nga luyag sang mga lot owners, iya ini nga panugyanan nga hitsuon na ang pagbayad sa ila agud indi na ini maglab-ot pa sa korte.
Ginkompirma man ni Billones nga may mga nakapalapit na sa iya nga mga lot owners kapareho sang pamilya Tan kag Ortiz apang bangud wala gihapon sila nagkasugot sang DPWH, ang korte na mismo ang nagdesisyon kun pila ang market value sang ila duta.Mahibaluan nga ang nasambit nga proyekto ang nagalawig sang 9.1 kilometers ang nasambit nga karsada gikan sa Barangay Culasi lapos sa Barangay Balijuagan, sining siyudad.
Suno pa sa kongresista naghatag na ini sang kapin sa 101 milyones pesos nga pondo agud nga matapos ang tulay kag makalapos ang karsada sa Barangay Sibaguan, sining siyudad.
Mahibaluan nga sadtong tuig 2013 ginsuguran ang amo nga proyekto nga ginpondohan sang kapin 300 tubtob 400 milyones pesos.
Matandaan nga ini ang nauntat bangud sa nangin isyu sang pagpamalabag sang pila ka mga lot owners nga ini ang mapadayon bangud wala sila nagpasugot sa gintan-ay sang gobyerno para sa ila maapektuhan nga propeidad.
