ROXAS CITY – Ginkompirmar ni Capiz 1st District Congressman Emmanuel ‘Tawi’ Billones Sr., nga may yara sang ginaplanohan nga tikang ang House of Representatives sa pagsipa ukon pagpabilin sa puwesto kay House Speaker Alan Peter Cayetano sa Kamara.
Ini ang ginpahayag ni Billones kasunod sa pagkwestyon sang pila ka mga mamalidha sa mga budgetary allocation para sa ila tagsa ka mga distrito nagikan sa 2021 national budget.
Suno kay Billones nga dismayado ang pila ka mga kongresista matapos nga indi patas ang paghatag sang alokasyon sang pondo kun sa diin may mga lugar nga sarang makabaton sang mataas kag may mga lugar naman nga limitado lamang.
Magluwas diri, nangin mainit man subong ang isyu natuhoy kay Cayetano kag Marinduque Rep. Lord Allan Velasco angut sa term sharing kag coup d’etat sa House leadership may kaangtanan sa national budget.
Dugang pa sini nga isa man sa nagpalab-ot sang iya nga concern si Negros Oriental 3rd District Rep. Arnolfo Teves Jr., natuhoy sa indi patas nga paghatag sang budgetary allocation sa mga kongresista.
Ginpahayag naman ni Billones nga isa sa mga ginaistoryahan subong sa tion nga sipaon sa puwesto si Cayetano bilang house speaker sang Kamara posible nga magatal-os si Davao Rep. Paulo Pulong Duterte kun sa diin natalana pa ini mabal-an sa Oktubre 17.
Samtang, nagalaom naman si Billones nga kuntani indi na mabuhinan pa ang P1.8 billion nga allocation budget nga ginpain nga pondo para sa mga proyekto sang iya nga distrito sa tuig 2021 bangud subject approval na lamang ang ginahulat sini.
Matandaan nga naglab-ot sa P1.6 billion ang budgetary allocation nga ginhatag kay Billones para sa tuig 2020 para sa mga proyekto sang iya nga distrito.
