Ginpangunahan ni Capiz Archbishop Most Rev. Victor B. Bendico, D.D. ang Welcome Mass para sa imahe ni Our Lady of Guadalupe ukon Madre Peregrina de Mexico sa Metropolitan Cathedral and Archdiocesan Shrine of the Immaculate Conception sa Roxas City subong nga Agosto 28, 2026.
Kabahin ini sang National Pilgrimage sang balaan nga imahe nga nagalibot sa nagkalain-lain nga lugar bilang pagpalapnag sang debosyon sa Mahal nga Birhen sang Guadalupe.
Sa iya homily, ginpatuhoy ni Archbishop Bendico ang mga tumuluo sa mensahe sang pagtuo kag pagsalig sa Diyos nga ginpakita sang Mahal nga Birhen Maria, ilabi na sa iya pagpakita kay Juan Diego, isa ka Indigenous Mexican nga Katoliko nga nakakita sa Mahal nga Birhen sa Tepeyac Hill sang Disyembre 1531.
Sunod sa tradisyon sang Simbahang Katolika, ginpahayag ni Our Lady of Guadalupe kay Juan Diego ang iya handum nga patindugon ang isa ka simbahan sa Tepeyac.
Bilang pamatuod sang iya mensahe, nagpakita ang imahe sang Mahal nga Birhen sa tilma ukon balabal ni Juan Diego, nga amo ang balaan nga imahe nga padayon nga ginatuuhan sang mga Katoliko tubtob subong.
Paagi sa pagbisita sang imahe sa Capiz, ginahatagan sang kahigayunan ang mga deboto nga magpalig-on sang ila pagtuo kag debosyon, samtang ginadumdum man ang mensahe sang Mahal nga Birhen nga magpalapit sa Diyos kag magpabilin nga may pagsalig sa iya.
Ang National Pilgrimage sang Our Lady of Guadalupe kabahin sang 9-Year Intercontinental Guadalupana Novena, nga nagapanghanda para sa Quincentenary Jubilee ukon ika-500 nga anibersaryo sang Apparitions of Our Lady of Guadalupe sa Tepeyac Hill.
