ROXAS CITY – Nagapadayon sa karon ang paghanas sang mga atleta sang delegado sang probinsiya sang Capiz nga magapasakop sa nagahilapit nga Western Visayas Regional Athletic Association (WVRAA) Meet 2020 sa pihak sang pagpaiway sang amo nga regional sporting-event bangud sang 2019 novel coronavirus (nCoV) outbreak.
Ini ang ginpahayag sang sports coordinator sang Department of Education (DepEd) Capiz Division nga si Mr. Ronnie Reteracion sang mainterview sang Bombo Radyo.
Suno kay Reteracion, nga wala nila ginpauntat ang paghanas sang nasambit nga mga atleta kag tubtob pa sa Pebrero 12 ang ila nga trainings.
Apang ginklaro ni Reteracion nga matapos ang Pebrero 12, magabalik sa ila tagsa ka mga eskwelahan ang mga student-athletes kag magapabilin sa ‘active-rest’.
Buot silingon sini suno kay Reteracion, magabalik sila sa pagsulod sa ila klase apang hatagan sila sa gihapon sang nagakaigo nga workouts sang ila mga trainers and coaches.
Indi mahimo suno kay Reteracion nga magapahuway sang malawig nga panahon ang mga student-athletes bangud posible nga makaapekto ini sa ila nga hampang sa tion nga may mangin pat-od na nga petsa ang WVRAA.
Mahibaluan nga ang nasambit nga regional sporting-event ang natalana kuntani nga pagahiwaton sa probinsiya sang Aklan nga magasugod sa Pebrero 15 tubtob 22, 2020 apang ginpaiway sang DepEd bangud sang pamahog sang nCoV.
