ROXAS CITY – Gindepensa ni Capiz 1st District Congressman Emmanuel Billones Sr., ang pagbawi sa Yes vote with reservation kag pagbaylo sa No Vote sa House Bil No. 6875 ukon anti terror bill.
Sa interview sang Bombo Radyo Roxas kay Congressman Billones, ginpahayag sini nga ginbayluhan sini sang No Vote ang boto kasunod sang ginpatigayon nga kunsultasyon sa mga local leaders kag constituents sa probinsiya sang Capiz nga personal nga ginhinyo ang pag-reconsider sang iya nga boto.
Aminado ang kongresista nga pila sa mga rason nga nagpabag-o sa iya nga desisyon amo ang indi pagpabor sa ginaduso nga warrantless arrest sang mga pulis sa ila ginadudahan mga terorista.
Ginklaro man ni Billones nga wala sang kahilabtanan ang Liberal Party sa iya nga desisyon kag aminado nga nagmag-an ang iya nga pamatyagan matapos napadala na ang sulat nga naga-unod sang rason sang pagbawi sang Yes Vote with Reservation sa secretary general sang House of Representative.
Samtang ginalauman na ni Congressman Billones nga mabuhinan ang mga proyekto kag pribilihiyo nga makuha sang probinsiya sa nangin desisyon, apang handa nga atubangon ang konsekwensiya.
