Congressman Billones Sr., nagpanugyanan sa mga pasaway nga bag-o abot gikan sa Manila nga magself quarantine

ROXAS CITY – Personal nga nagpaidalum sa self quarantine ang kongresista sang probinsiya sang Capiz, matapos nakapauli na gikan sa Metro Manila.

Suno kay Capiz 1^st District Congressman Emmanuel Billones Sr., gilayon siya nga  nagself quarantine bilang pagsunod sa ginpaguwa nga Executive Order, nga tanan nga mga bag-o abot gikan sa Manila ang kinahanglan nga maghome quarantine agud malikawan ang paglapta sang COVID-19.

Personal nga nagtawag sa Bombo Radyo ang kongresista matapos nakabaton sang impormasyon nga iban nga mga bag-o abot sa Capiz ang nagpakatig-a nga magsunod kag sa baylo nagaguwa pa sa ila balay sa pihak nga ginadumilian sila sang mga opisyales sang ila nga barangay.

Bangud diri, nag-apekar  si Billones nga indi dapat magpasaway ang ulo kag kun mahimo magsunod sa patakaran para sa kaluwasan sang tanan sa probinsiya.

Ginpahayag pa sang opisyal nga daku nga bulig na sa gobyerno kun magasunod lamang ang tanan sa panugyan sang gobyerno, sa diin pinaagi sini, mahimo nga malikawan ang paglapta sang COVID-19.

Aminado si Billones nga ini man ang rason nga wala siya nakatambong sa pagreconvene sang Provincial Development Council sa diin gintalakay ang Annual Investment Plan 2020 sang probinsiya.

Karon nga naka-self quarantine si Billones ginasunod sini ang social distancing sa iya mga kaupdanan sa balay.