ROXAS CITY – Paga-imbestigahan sang Committee on Infrastructure sang Sangguniang Panlalawigan ang ginapatukod nga Capiz Cultural and Sports Center, sa Capiz Villareal Stadium.
Sa interview sang Bombo Radyo kay Hon. Gilbert Ardivilla, chairman sang nasambit nga komite, ginpahayag sini nga magapatawag ini sang pagsinapol sa Setyembre 12, Lunes nga adlaw, agud patigayunon ang forensic structural investigation sang nasambit nga edipisyo nga proyekto sang Contreras administration.
Natukiban man suno diri nga wala sang building permit ang konstruksyon sang amu nga edipisyo kag wala sang koordinasyon sa bahin sang Sanggunian ang pagpahamtang sang amu nga istruktura sa Villareal stadium, bangud para kay Ardivilla, kaangay sa nangin ‘photo bomber’ lang ini sa Capiz Gymnasium.
Apang bangud naumpisahan na ini kag madali nalang kuntani mahuman, wala naman sang mahimo ang sa karon nga administrasyon, rason nga patigayunon ang imbestigasyon agud matumod kun nasunod bala sang contractor ang structural integrity agud malikawan ang posible kahalitan sa mga palaabuton nga kalamidad.
Nahibaluan nga nagsugod ang konstruksyon sang amu nga istruktura sang Hunyo 30, 2021 kag target kuntani nga matapos sang Hulyo 24, 2022, apang temporaryo ini nga ginpauntat matapos ang ginpapanaog nga suspension order sang DPWH bangud sa nabaton nga reklamo angut sa nasambit nga proyekto.
Matandaan nga ginpondohan ini nga proyekto ni Senator Francis Tolentino kag may kabug-osan nga pondo nga nagalab-ot sa P60 million.
