ROXAS CITY – Ginkumpirmar sang Capiz Schools Division Superintendent nga isa sila sa mga probinsya sa pungsod nga nakabaton sang laptops nga ginpanagtag sang DepEd central office, sang tuig 2021.
Ini ang ginpahayag ni Dr. Miguel Mac Aposin sandig sa impormasyon nga nagikan sa ila IT Officer, sang mainterview sang Bombo Radyo.
Suno diri, nagkadto ang mga nag-abot nga laptops sa mga Alternative Learning System (ALS) Mobile Teachers kag District Supervisors.
Apang, indi pa mahatag ni Dr. Aposin ang numero sang mga nag-abot nga laptops bangud nagapadayon pa ang iya nga pagberipika sa ila records sang 2021.
Ginklaro man sini nga tuigan ang pagpadala sang mga IT equipments sang central office sa idalom sang DepEd Computerization program, gani nagabaton gid lamang ang Capiz Division.
Nahibaluan nga gin-reassign si Aposin sa Capiz sang bulan sang Hunyo, sini nga tuig, tal-os kay Dr. Salvador Ochavo, Jr.
Matandaan nga sandig sa 2021 audit report sang Commission on Audit (COA) nga nagbakal ang Department of Education (DepEd) sang P2.4 billion nga balor sang ‘outdated’ bangud sa Intel Celeron nga processor kag over-priced laptops para sa mga manunudlo.
Sa pihak nga bahin, gin-anunsyar ni Aposin nga sa palaabuton nga Lunes, Agosto 8, magapatigayon sang Regional kick off sang Brigada Eskwela, isa ka special event DepEd, kun sa diin host ang Capiz division, kag pagapadulongan sang nagkalain-lain nga division heads sa Region 6.
Magasugod ang kick off sa isa ka caravan padulong sa Villareal stadium nga pagapatigayunan sang nakalinyada nga programa.
