ROXAS CITY –Ginkompirmar ni Capiz First District Representative Emmanuel Tawi Billones Sr nga wala ini makaboto sa ginpatigayon nga sesyon sang KAMARA agud ibutang nga House Speaker ni Marinduque Representative Lord Allan Velasco sa Celebrity Sports Plaza sa Quezon City.
Ginpahayag ni Billones nga nagtambong ini sa nasambit nga sesyon pinaagi sa zoom meeting apang wala ini makaboto bangud gulpihanay ang nasambit nga piniliay.
Gindugang pa sini nga subong pa lang kuntani nga gab-e magapatigayon sang sinapol ang mga kongresista sa idalom sang Partido Liberal kun sino ang ila nga pagasuportahan sa house speakership.
Magluwas diri, pagadesisyonan man sang partido kun magaboto sila as a “bloc” ukon indibidwa ini silal nga magaboto sa ila nga nahamut-an nga lider sa KAMARA.
Apang gin-athag ni Billones nga neutral ang mga kongresista sa Partido Liberal kag handa nga magsunod sa kun sino ang manginliderato sa KAMARA.
Ginpahayag man sini nga magapatigayon sang sesyon ang KAMARA buwas nga adlaw agud makompirmar kun legal ang pagboto sang kapin 186 ka mga kongresista pabor kay Velasco.
Samtang nagapati naman si Billones nga kinahanglan na nga tapuson sang KAMARA ang nagasingki nga tensyon sa tunga ni Cayetano kag ni Velasco.
