Padayon na ang mga preparasyon para sa ginplano nga pagtukod sang Capiz General Hospital (CGH), kasunod sang pag-usisa sa ginapanugyan nga lugar nga pagapatukuran sini sa Barangay Malagit, Pontevedra, Capiz.
Sa direksyon ni Governor Fredenil H. Castro, gintugyan ang una nga pagpanguna kag pagpasanyog sang sini nga proyekto agud masugoran ang mga kinahanglanon nga tikang para sa pagpatuman sini.
Lakip sa mga una nga tikang ang paglakip sang proyekto sa Annual Operational Plan (AOP) kag Local Investment Plan for Health (LIPH), kag ang pagpresentar sini sa Provincial Development Council (PDC) para sa pag-endorso sa Regional Development Council (RDC).
Bilang kabahin sang preparasyon, nagpatigayon ang grupo sang pagbisita sa Barangay Malagit agud usisaon ang ginaplano nga lokasyon nga mainalwanon nga ginatanyag sang tag-iya sang duta nga si Mr. Pepe Borres.
Ang amu nga pagbisita isa ka importante nga tikang sa pagpauswag sang proyekto kag sa pagpreparar sang mga kinahanglanon antes ang posible nga pagpatuman sang pagtukod sang ospital.
Isa ini ka inisyatibo ni Governor Fredenil H. Castro kag Congressman Howard A. Guintu, nga nagapakita sang ila pagpanikasog nga mapalig-on ang mga serbisyo sa ikaayong-lawas kag mapalapad ang access sang mga Capisnon sa dekalidad nga pag-atipan sa ospital.
Nag-upod sa pagpreparar ang mga representante sang Capiz Provincial Health Office (PHO), Department of Health (DOH), Provincial Engineering Office (PEO), kag ang tag-iya sang duta.
Paagi sa pagbinuligay sang mga ahensya kag mga lider sang probinsya, ginapadayon ang mga tikang agud mangin realidad ang ginaplano nga Capiz General Hospital.
Ginapaabot nga ang ini nga proyekto mangin kabahin sang pagpalig-on sang sistema sang ikaayong-lawas sa Capiz kag sang handum nga mangin isa sa may pinakamaayo nga kahimtangan sa serbisyo ang mga pumuluyo sang probinsya, suno sa handum nga “Healthiest Capisnon.”
